សារអេឡិចត្រូនិច
ចៅហ្វាយក្រុង​បាងកក​ អរគុណ​អ្នកគាំទ្រ​បន្ទាប់​ពី​ឈ្នះ​អាណត្តិ​ទី​២


គណបក្សប្រឆាំង​ថៃ​បាន​រក្សា​ការគ្រប់គ្រង​ក្រុង​បាងកក​កាលពី​ថ្ងៃ​អាទិត្យ​នៅ​ពេល​លោក​ស៊ូ​ខុម​បាន ផា​រី​បា​ត្រា​បាន​ជម្នះ​ការ​ស្ទង់​មតិ​អវិជ្ជមាន​និង​ឈ្នះ​ការបោះឆ្នោត​ជ្រើសរើស​ចៅហ្វាយក្រុង​បាងកក​សំរាប់​អាណត្តិ​ទី​២​។​

លោក​បាន​បំបាក់​ការ​ប្រជែង​យ៉ាងខ្លាំង​ពី​លោក​ពង់​សា​ផាត ពង់​ចារ៉ឺ​ន​មកពី​គណបក្ស​កាន់អំណា​ច​ភឿ​ថៃ​ក្នុងការ​ប្រកួតប្រជែង​យ៉ាង​​តឹងតែង​ដែល​វា​រំលេច​អោយឃើញ​ការបែកបាក់​ជាតិ​ដ៏​ជ្រាលជ្រៅ​។​

​នៅ​មុន​ការបោះឆ្នោត ពួក​ប្រជាធិបតេយ្យ​បាន​ទទូច​អោយ​ពួក​វណ្ណៈ​កណ្តាល​ភាគច្រើន​នៅ​ក្រុង​បាងកក​បោះឆ្នោត​ប្រឆាំង​ការ​កាន់​​កាប់​នយោបាយ​ផ្តាច់មុខ​របស់​គណបក្ស​ភឿ​ថៃ​តាម​រយៈ​បោះឆ្នោត​គាំទ្រ​គណបក្សប្រឆាំង​សំរាប់​តំណែង​ចៅហ្វាយក្រុង​នេះ​។​ភឿ​ថៃ​​កាន់កាប់​កៅអី​សភា​២៦៥​ក្នុង​សភា​ដែលមាន​៥០០​កៅអី​។​

​នៅ​ស្នាក់ការ​គណបក្ស​ប្រជាធិបតេយ្យ​កាលពី​ល្ងាច​ថ្ងៃ​អាទិត្យ លោក​ស៊ូ​ខុម​បាន បាន​ខំ​ទប់​ទឹកភ្នែក​នៅ​ពេល​លោក​អរគុណ​អ្នកគាំទ្រ​។​

​វា​ជា​ការ​ឈ្នះ​លើក​ទី​៤​ជាប់ៗ​គ្នា​សំរាប់​គណបក្ស​ប្រជាធិបតេយ្យ​ក្នុង​ការប្រកួតប្រជែង​យក​តំណែង​អភិបាល​ក្រុង​នេះ​។​

​នាយករដ្ឋមន្ត្រី​ថៃ លោកស្រី​យី​ង​ឡាក់ ស៊ីណាវ៉ាត្រា កាលពី​ថ្ងៃ​ម្សិលមិញ​ក៏​បាន​អបអ​រលោក​ស៊ូ​ខុម​បាន​ចំពោះ​ជោគជ័យ​របស់​លោក ដោយ​លោកស្រី​បាន​មានប្រសាសន៍ថា ​"​គណបក្ស​​ភឿ​ថៃ និង​រដ្ឋាភិបាល​នឹង​គាំទ្រ​ដោយ​រីករាយអភិបាលក្រុង​បាងកក​និង​មានបំណង​ធ្វើការ​ជាមួយ​លោក​ស៊ូ​ខុម​បាន​"​។​

​ក្នុងពេល​ជាមួយគ្នា បេក្ខជន​គណបក្ស​ភឿ​ថៃ​លោក​ពង់​សា​ផាត​បាន​ទទួលស្គាល់​បរា​ជ័យ​និង​ក៏​បាន​អបអរ​គូប្រជែង ស៊ូ​ខុម​បាន​៕