សារអេឡិចត្រូនិច
ធនាគារ​ស្រូវ​គ្រោង​បោះទុន​ជាង​១០​លាន​ដុល្លារ​ដើម្បី​ពង្រីក​ឃ្លាំង​ស្តុក និង​ឡ​ស​ម្ងួ​ត​ស្រូវ


ភ្នំពេញ​៖ ធនាគារ​ស្រូវ​នៅ​កម្ពុជា គ្រោង​បោះទុន​ជាង​១០​លាន​ដុល្លារ​អា​មេ​រិ​ក ដើម្បី​វិនិយោគ​សាងសង់​ឃ្លាំង​ស្តុក និង​ឡ​ស​ម្ងួ​ត​ស្រូវ​នៅ​ខេត្តបាត់ដំបង ជា​ខេត្ត​ជង្រុក​ស្រូវ​របស់​កម្ពុជា​។

លោក​ឧកញ៉ា ភួ ពុ​យ អគ្គនាយក​ធនាគារ​ស្រូវ​កម្ពុជា បាន​ថ្លែង​ឲ្យ​ដឹង​តាម​ទូរស័ព្ទ​នៅ​រសៀល​ថ្ងៃ​ទី​៤ មក​រា​នេះ​ថា ដើម្បី​ដោះស្រាយ​បញ្ហា​ប្រឈម​លើ​កង្វះ​ឃ្លាំង​ស្តុក និង​ឡ​ស​ម្ងួ​ត​ស្រូវ លោក​នឹង​បោះទុន​វិនិយោគ​ជាង​១០​លាន​ដុល្លារ ដើម្បី​វិនិយោគ​លើ​ផ្នែក​នេះ​នៅ​ឆ្នាំ​២០១៧​នេះ​។ លោក​បន្ត​ថា គម្រោង​នេះ​មានការ​គាំទ្រ​ពី​ធនាគារឯកជន និង​មានការ​គាំទ្រ​មួយ​ផ្នែក​ពី​រដ្ឋាភិបាល ព្រោះ​ប្រសិនជា​យើង​មិន​មាន​ឡ​ស​ម្ងួ​ត​និង​ឃ្លាំង​ស្តុក​ស្រូវ​គ្រប់គ្រាន់​ទេ បញ្ហា​ប្រឈម​ក្នុង​វិស័យ​នេះ មិន​អាច​ដោះស្រាយ​បាន​នោះ​ទេ​។

លោក​បន្ត​ថា ធនាគារ​ស្រូវ​គ្រោង​រៀបចំ​សហគមន៍​កសិករ តាម​រយៈ​ការ​ចុះ​កិច្ចសន្យា​ជាមួយ​កសិករ ដើម្បី​ធ្វើ​ឲ្យ​ផលិតផល​កសិកម្ម​របស់​ពួក​គេ មាន​តម្លៃ​ដោយ​ស្ថិរភាព និង​មាន​ទីផ្សារ ពិសេស​បញ្ចៀស​បាន​នូវ​ការ​ក្រឡុក​តម្លៃ​ពី​ក្រុម​ឈ្មួញកណ្តាល​។

លោក​ឧកញ៉ា​បាន​បន្ត​ថា បច្ចុប្បន្ន​នៅ​កម្ពុជា​មាន​រោង​ម៉ាស៊ីនកិនស្រូវ​ប្រមាណ​២៧០​កន្លែង ដែល​អាច​កិន​អង្ករ​នាំ​ចេញ​បាន​ប្រកបដោយ​គុណភាព​ខ្ពស់​។

កាលពី​ចុងឆ្នាំ​២០១៦​កន្លង​មកនេះ ក្រុមហ៊ុន​ចិន​ចំនួន​ពីរ​ក៏​បាន​បង្ហាញ​ពី​គម្រោង​វិនិយោគ​លើ​ទឹកប្រាក់​៤០០​លាន​ដុល្លារ​អា​មេ​រិ​ក ដើម្បី​សាងសង់​ឃ្លាំង និង​ឡ​ស​ម្ងួ​ត​ស្រូវ ដើម្បី​កិន​ជា​អង្ករ​នាំ​ចេញ​ទៅ​កាន់​ប្រទេស​ចិន​ផង​ដែរ​។

កង្វះ​ឡ​ស​ម្ងួ​ត និង​ឃ្លាំង​ស្តុក​ស្រូវ​ជា​បញ្ហា​ប្រឈម​ធំ​បំផុត​នៅ​ក្នុង​វិស័យ​នេះ ដែល​បាន​រីក​រាលដាល​ដល់​កសិករ ព្រោះ​ពេល​រោង​ម៉ាស៊ីនកិនស្រូវ​ខ្វះ​កន្លែង​ស្តុក និង​ឡ​ស​ម្ងួ​ត​ពួក​គេ​មិន​អាច​លក់​ផលិតផល​ពួក​គេ​ទាន់​ពេលវេលា​នោះ​ទេ​។

លោកឧកញ៉ា​តែ តាំង​ប៉​ប្រធាន​សម្ព័ន្ធ​សមាគម​សហគ្រាស​ធុន​តូច និង​មធ្យម​បាន​ថ្លែង​ថា ដោយសារ​បញ្ហា​កង្វះ​ឃ្លាំង​ស្តុក និង​ឡ​ស​ម្ងួ​ត​នេះ ទើប​លោក​សម្រេចចិត្ត​បោះទុន​ជាង​១​លាន​ដុល្លារ​វិនិយោគ​ឡ​ស​ម្ងួ​ត និង​គ្រោង​បោះទុន​ជា​ច្រើន​ទៀត​ដើម្បី​បង្កើត​ឃ្លាំង​ស្តុក​ស្រូវ​នៅ​ក្នុង​ឃុំ​កំពង់​គោ ស្រុក​កំពង់ស្វាយ ខេត្តកំពង់ធំ​នៅ​ឆ្នាំ​នេះ ដើម្បី​ជួយ​កសិករ​ផង​ដែរ​។

លោក​បន្ត​ថា​“​នៅ​ឃុំ​នេះ​មាន​ភូមិ​ចំនួន​៥ មាន​ផ្ទៃដី​ស្រែ​ជាង​១​ម៉ឺន​ហិ​កតា ដែល​អាច​ធ្វើស្រែ​បាន​ពីរ​ដង​ក្នុង​មួយ​ឆ្នាំ ហេតុនេះ​ទើប​លោក​សម្រេចចិត្ត​វិនិយោគ​នៅ​តំបន់​នោះ ដោយ​មានការ​គាំទ្រ​ពី​ឥណទាន​របស់​មីក្រូហិរញ្ញវត្ថុ​របស់​សម្ព័ន្ធ​សមាគម​សហគ្រាស​ធុន​តូច និង​មធ្យម​ផង​ដែរ​”៕

ប្រភពពីៈ ទូរទស្សន៍បាយ័ន

ព័ត៌មានថ្មីៗ