សារអេឡិចត្រូនិច
ភិន សុ​ដា​លី​ស សម្តែង​រឿង​ភាគ​ថ្មី ក្រោយ​ពី​ផ្អាក​សម្តែង​មួយ​រយៈពេល​កន្លង​មក


ភ្នំពេញ​: ផលិតកម្ម​មហាហង្ស ទទួល​បាន​សិទ្ធ​ផលិត​រឿង ឲ្យ​ស្ថានីយ៍ទូរទស្សន៍​ភី​អិន​អិន (TV PNN) បាន​សំ​រឹត​សំរាំង និពន្ធ​រឿង​ភាគ​ដាក់​ទូរទស្សន៍​ជា​លើក​ទី​២​នូវ​រឿង “​ម្ចាស់បំណុល​” បន្ទាប់​ពី​រឿង “​បំភ្លេច​មិន​បាន​” ដែល​ត្រូវ​បញ្ចប់​នៅ​ក្នុង​ខែឧសភា ២០១៧ ហើយ​ចាក់​បន្ត​នៅ​រឿង “​ម្ចាស់បំណុល​” នៅ​ខែមិថុនា ២០១៧​ខាង​មុខ​នេះ​។ 

លោក អិន សុ​ភិន ចាងហ្វាង​ផលិតកម្ម​មហាហង្ស បាន​ឲ្យ​ដឹង​នៅ​ក្នុង​ពិធី​ក្រុង​ពាលី​រឿង ថា នេះ​ជា​រឿង​ដែល​លោក និពន្ធ​ផ្ទាល់​ដោយ​មិន​ចំលង​ពី​បរទេស ជា​ស្នាដៃ​និពន្ធ​ថ្មី​សុទ្ធសាធ ដែល​ភាគច្រើន​នៃ​សាច់​រឿង គឺ​លោក​ផ្តោត​លើ​ស្ត្រី​មេផ្ទះ​ជា​ចម្បង​។ សាច់​រឿង​ដែល​បង្កប់​គ្រប់​រសជាតិ​ជីវិត មាន​ឈ្នានីស ឌឺដង កាច់ កុង​គ្នា ពោល​គឺ​មាន​គ្រប់​រសជាតិ ។ លោក​បន្ត​ថា​រឿង​នេះ ខ្ទង់ចំណាយ​ប្រមាណ​ជា ១៥​ម៉ឺន​ដុល្លារ​អា​មេ​រិ​ក ដែល​មាន​ចំនួន​៥០​ភាគ ហើយ​គ្រោង​នឹង​ដាក់​បញ្ចាំង​នៅ​ក្នុង​ស្ថានីយ៍ទូរទស្សន៍​ភី​អិន​អិន នៅ​ដើមខែ មិថុនា ២០១៧​។ 

លោក​បន្ត​ថា ការ​ដាក់​បញ្ចូល​កូនស្រី​របស់​ខ្លួន ជា​តួឯក​ក្នុង​រឿង មិនមែន​លោក​ជា​អ្នកធ្វើការ​សម្រេចចិត្ត​នោះ​ទេ ពោល​ការ​ដាក់​បញ្ចូល​តួរ​ប្រុស​-​ស្រី ត្រូវ​បាន​ឆ្លងកាត់​ការ​យល់ព្រម​ពី ស្ថានីយ៍ទូរទស្សន៍​។ ដូច្នេះ មិន​មាន​ហេតុផល​ដែល​លោក​ត្រូវ ទទួល​ការ​រិៈ​គន់​ឡើយ ជាក់ស្តែង​ទីផ្សារ​របស់ តារា​សម្តែង​អ្នក​មេម៉ាយ​កូន​មួយ​សាច់​ខ្ចី​រូប​នេះ ក៏​នៅ​មាន​ទីផ្សារ​ខ្ពស់ និង​ទទួល​បាន​ប្រជាប្រិយ៍ភាព​មិន​ថមថយ​ឡើយ អីចឹង​ហើយ បានជា ភិន ដា​លិ​ស នៅ​តែ​គ្រង​តំណែង​តួឯក នៅ​ក្នុង​រឿង “​ម្ចាស់បំណុល​”​។ 

រឿង ភាគ “​ម្ចាស់បំណុល ”  ចូលរួម​សម្តែង​ដោយ​តារា​ប្រុស​-​ស្រី ប្រមាណ​ជាង ៥០​នាក់ ក្នុង​នោះ អ្នក​នាង ភិន សុ​ដា​លី​ស សម្តែង​ជា​តួឯក​ស្រី និង លោក​ភិ​ម តារា​វិបុល ជា​តួឯក​ប្រុស និង មាន​តារា​សម្តែង​ល្បី​ៗ​ជា ច្រើន​ទៀត រួម​មាន លោក​ហម ឈ​រ៉ា​, កញ្ញា​សឿ​ន ផា​ន​ផា​ភួង​, លោក​ហង្ស សម្បើម​ស័ក្តិ​, កញ្ញា​សុវណ្ណ រ៉ា​ផា​, កញ្ញា​គី​ង រស្មី​, អ្នកស្រី​ពៅ ថា​វី កញ្ញា សម្ផស្ស​, លោក​ថម មី អ្នកស្រី​ផល្លា និង កញ្ញា​ហង្ស ស្រី​រ័​ត្ន ជាដើម ក៏​បាន​ចូលរួម សម្តែង​ជាមួយ​គ្នា​នេះ​ដែរ ។

ចំណែក អ្នក​នាង ភិន សុ​ដា​លិ​ស បាន​បញ្ជាក់​ថា រឿង​ភាគ “​ម្ចាស់បំណុល​” ជា​រឿង​ដែល​ឪពុក​នាង និពន្ធ​ផ្ទាល់ ដូច្នេះ​រឿង​នេះ​មាន​ចំនុចខ្លាំង​ច្រើន ដែល​ធ្វើ​ឲ្យ​នាង​រំពឹង​ថា តាម​រយៈ​ខ្សែរ​រឿង​ថ្មី​នេះ នឹង​ធ្វើ​ឲ្យ​នាង​ឡើង​កូដ​។ នាង​បន្ថែម​ថា រឿង​ម្ចាស់បំណុល​នេះ នាង​សម្តែង​ជា​ថ្មី​ជាមួយនឹង តារា​ប្រុស លោក ភឹ​ម តារា​វិបុល ដែល​ធ្លាប់​សម្តែង​រួម​គ្នា​ទទួល​ជោគជ័យ​ក្នុង​រឿង​កន្លង​មក​៕