សារអេឡិចត្រូនិច
ជប៉ុន​បញ្ជូន​នាវាចម្បាំង ផ្ទុក​ឧទ្ធម្ភាគចក្រ​ដ៏​ធំ​បំផុត ទៅ​សមុទ្រ​ចិន​ខាងត្បូង


ជប៉ុន នឹង​បញ្ជូន​នាវាចម្បាំង ធំ​បំផុត​មួយ ដែល​ផ្ទុក​ឧទ្ធម្ភាគចក្រ ច្រើន​គ្រឿង​របស់​ខ្លួន ក្នុង​ការ​ធ្វើ​នាវាចរណ៍ រយៈពេល​ចំនួន ៣ ខែ ដោយ​ធ្វើ​ដំណើរ​កាត់ តាម​សមុទ្រ​ចិន​ខាងត្បូង ដោយ​ចាប់ផ្តើម​ធ្វើ នាវាចរណ៍​នេះ នៅ​ខែឧសភា​។ 

នេះ​ត្រូវ​បាន​គេ​មើលឃើញ​ថា ជា​ការ​បង្ហាញ កងកម្លាំង​ទ័ពជើងទឹក ដ៏​ធំ​បំផុត​របស់​ជប៉ុន​នៅ​ក្នុង​តំបន់​នេះ ចាប់តាំងពី​សង្គ្រាមលោក​លើក​ទី​២ មក​។

នាវា​ផ្ទុក​ឧទ្ធម្ភាគចក្រ Izumo របស់​ជប៉ុន​នេះ គ្រោង​នឹង​ឈប់​សំចត នៅ​ប្រទេស​សិង្ហ​បុរី ឥណ្ឌូ​នេ​ស៊ី ហ្វី​លី​ពី​ន និង ស្រី​លង្កា មុន​ពេល​ចូលរួម​ធ្វើ សមយុទ្ធ​ជើង​ទឹក​រួម​មួយ ជាមួយ

នាវា​កងទ័ពជើងទឹក​អា​មេ​រិ​ក និង​ឥណ្ឌា នៅ​មហាសមុទ្រ​ឥណ្ឌា នៅ​ខែកក្កដា​។

ចិន​បាន​អះអាង សិទ្ធិ​កាន់កាប់​ទឹកដី ស្ទើរតែ​ទាំងស្រុង នៅ​សមុទ្រ​ចិន​ខាងត្បូង ដែល​មាន​ជម្លោះ​នេះ និង​ការ​កើនឡើង នៃ​វត្តមាន​យោធា របស់​ខ្លួន នៅ​សមុទ្រ​នេះ បាន​បណ្តាល​ឱ្យ​មាន ការ​ព្រួយបារម្ភ​ដល់​ជប៉ុន និង​បណ្តា​ប្រទេស​បស្ចិមប្រទេស​។

សហរដ្ឋអាមេរិក ធ្វើការ​ល្បាត​តាម​អាកាស និង​នាវា​ជា​ច្រើន​លើក ដើម្បី​ធានា​បាន​នូវ​សេរីភាព នៃ​ការ​ធ្វើ​នាវាចរណ៍ នៅ​សមុទ្រ​នេះ​។

ក្រុម​មន្ត្រី​កងទ័ព បាន​និយាយ​ថា នេះ​ជា​ការ​សាកល្បង សមត្ថភាព នៃ​នាវា​ផ្ទុក​យន្តហោះ Izumo​ដោយ​បញ្ជូន​វា​ចេញ ក្នុង​បេសកកម្ម​ពង្រីក សមត្ថភាព​របស់​ខ្លួន ហើយ វា​នឹង​ចូលរួម​ហ្វឹកហាត់ ជាមួយ​កងទ័ពជើងទឹក​អា​មេ​រិ​ក នៅ​មហាសមុទ្រ​ឥណ្ឌា​នេះ​។ នាវា​ជប៉ុន​នេះ នឹង​ត្រឡប់​ទៅ​កាន់​ប្រទេស​ជប៉ុន នៅ​ខែសីហា​៕