សារអេឡិចត្រូនិច
វឌ្ឍនភាព នៃ​ការ​ត្រួតពិនិត្យ ផលិតផល​ថ្នាំជក់ នៅ​កម្ពុជា


ភ្នំពេញ​: បច្ចុប្បន្ន​នេះ​ការ​អនុវត្តន៍​ការ​បោះពុម្ព​សារ​ព្រមាន​សុខភាព​ជា​រូបភាព​និង​ជា​អក្សរ​នៅ​នៅ​លើ​កញ្ចប់​បារី នៃ​ប្រទេស​កម្ពុជា​នៅ​តែ​មាន​កម្រិត​នៅឡើយ ដែល​មាន​ន័យ​ថា​ក្រុមហ៊ុន​ថ្នាំជក់​នៅ​ក្នុងស្រុក​ខ្មែរ​នៅ​តែ​អនុវត្តន៍​មិន​បាន​ត្រឹមត្រូវ ទៅ​តាម​ច្បាប់​របស់​ប្រទេស​កម្ពុជា​យើង​។

បើ​តាម​សេចក្តី​ប្រកាស​ព័ត៌មាន​របស់​អង្គការ​ចលនា​ដើម្បី​សុខភាព​កម្ពុជា (CMH) នៅ​ថ្ងៃ​ទី​១៧​ខែមីនា​នេះ បាន​លើក​ឡើង​ថា ការ​កាត់​បន្ថយ​គ្រោះថ្នាក់​ដែល​បណ្ដាល​មក​ពី​ការ​ប្រើប្រាស់​ថ្នាំជក់​ជា​និន្នាការ​សកល​។ មួយ​ក្នុង​ចំណោម​ប្រទេស​ដទៃ​ទៀត​លើ​ពិភពលោក រដ្ឋសភា​នៃ​ព្រះរាជាណាចក្រ​កម្ពុជា បាន​ផ្ដល់​សច្ចាប័ន​ចូល​ជា​សមាជិក នៃ​អនុ​ញ្ញា​ស្ដី​ពី​ការ​ត្រួតពិនិត្យ​ថ្នាំជក់​របស់​អង្គការ​សុខភាព​ពិភពលោក តាំងពី​ឆ្នាំ​២០០៥ ក្នុង​ទិស​ដៅ​កាត់​បន្ថយ​ការ​ស្លាប់ ការ​កើត​ជំងឺ និង ពិការ​ភាព​ដែល​បណ្ដាល​មក​ពី​ការ​ប្រើប្រាស់​ថ្នាំជក់​ក្នុង​ចំណោម​ពលរដ្ឋ​កម្ពុជា​។

ដោយ​អនុលោម​តាម​អនុសញ្ញា​ស្ដី​ពី​ការ​ត្រួតពិនិត្យ​ថ្នាំជក់​នេះ រាជរដ្ឋាភិបាល​កម្ពុជា ក្រោម​ការ​ដឹកនាំ​របស់​សម្ដេច​អគ្គមហាសេនាបតី​តេ​ជោ ហ៊ុន សែន នាយក​រដ្ឋមន្ត្រី​នៃ​ព្រះរាជាណាចក្រ​កម្ពុជា បាន​អនុម័ត​ច្បាប់​ស្ដី​ពី​ការ​ត្រួតពិនិត្យ​ផលិតផល​ថ្នាំជក់ និង​បញ្ជូន​ទៅ​កាន់​សភាជាតិ​។ បន្ទាប់​មក​ច្បាប់​នេះ ក៏​ត្រូវ​បាន​អនុម័ត​ដោយ​រដ្ឋសភា​និង​ព្រឹទ្ធសភា ព្រមទាំង​ត្រូវ​បាន​ឡាយព្រះហស្ដលេខា ដាក់​ឲ្យ​អនុវត្ត​នៅ​ថ្ងៃ​ទី​១៨ ខែឧសភា ឆ្នាំ​២០១៥ ដោយ​ព្រះមហាក្សត្រ​នៃ​ព្រះរាជាណាចក្រ​កម្ពុជា​។

យើង​ឃើញ​ថា រដ្ឋាភិបាល​កម្ពុជា នៅ​តែ​បន្ត​យកចិត្តទុកដាក់​ទៅ​លើ​កិច្ចការ​ត្រួតពិនិត្យ​ផលិតផល​ថ្នាំជក់​។ 

ក្រោម​កិច្ច​ផ្ដួចផ្ដើម​របស់​ក្រសួងសុខាភិបាល អនុក្រឹត្យ​ពីរ​ត្រូវ​បាន​អនុម័ត​ទៅ​តាម​ការ​ចង្អុលបង្ហាញ​ក្នុង​ច្បាប់​រួម​មាន អនុក្រឹត្យ​ស្ដី​ពី​វិធានការ​ហាម​ការ​ជក់ ឬ​ការ​បង្ហុយផ្សែង​ផលិតផល​ថ្នាំជក់ នៅ​កន្លែងធ្វើការ ឬ​កន្លែង​សាធារណៈ និង អនុក្រឹត្យ​ស្ដី​ពី​ការ​បោះពុម្ព​សារ​ព្រមាន​សុខភាព ជា​ភាសា​ខ្មែរ និង​ជា​រូបភាព លើ​កញ្ចប់​ផលិតផល​ថ្នាំជក់​។ បន្ថែម​ពី​នេះ កម្ពុជា​ក៏​មាន​ប្រកាស​ស្ដី​ពី​វិធានការ​ចំពោះ​ការ​ដាក់​តាំង​បង្ហាញ កញ្ចប់​ផលិតផល​ថ្នាំជក់ ដែល​ចេញ​ដោយ​រដ្ឋមន្ត្រី​ក្រសួងសុខាភិបាល​។ ក្រៅពី​ក្រសួងសុខាភិបាល ក្រសួង​សេដ្ឋកិច្ច​និង​ហិរញ្ញវត្ថុ ក៏​បាន​យកចិត្តទុកដាក់​ក្នុង​ការ​កាត់​បន្ថយ​ការ​ប្រើប្រាស់​ថ្នាំជក់ តាម​រយៈ​ការ​អនុវត្ត​វិធានការ​ដំឡើង​ពន្ធ​ពីរ​ដង​បន្តបន្ទាប់​គ្នា​ផង​ដែរ​។

យ៉ាងណាមិញ ការ​បោះពុម្ព​សារ​ព្រមាន​សុខភាព ជា​រូបភាព​លើ​កញ្ចប់​បារី មាន​សារៈសំខាន់​ក្នុង​ការ​បង្ការ​កុមារ និង​យុវជន ពី​ការ​ចាប់ផ្ដើម​ប្រើប្រាស់​ផលិតផល​ថ្នាំជក់ ក៏​ដូច​ជា​វិធានការ​អប់រំ​ផ្សព្វផ្សាយ អំពី​ផលវិបាក​និង​គ្រោះថ្នាក់ នៃ​ការ​ប្រើប្រាស់​ថ្នាំជក់​ផង​ដែរ​។ អ្វី​ដែល​សំខាន់ វិធានការ​នេះ​ត្រូវ​បាន​ប្រជាពលរដ្ឋ​កម្ពុជា ៩៥% ជឿជាក់​ថា​ពិតជា​មាន​ប្រសិទ្ធភាព​បង្ការ​ពលរដ្ឋ ពី​ការ​ចាប់ផ្ដើម​ជក់បារី ក៏​ដូច​ជា​ជំរុញ​ឲ្យ​អ្នក​ជក់​ផ្ដាច់​បារី (​ស្ថិតិ​របស់​ក្រសួងផែនការ​ចេញ​ឆ្នាំ​២០១៤)​។ ថ្វីបើ​ទំហំ​សារ​ព្រមាន​ជា​រូបភាព​កម្ពុជា នៅ​តូច​ជាង​សារ​នៃ​ប្រទេស​ភាគច្រើន នៅ​ក្នុង​តំបន់​អាស៊ី​អាគ្នេយ៍ តែ​វា​ការ​ចាប់ផ្ដើម​ដ៏​ល្អ​មួយ​។ 

ប្រ​ទស​អាស៊ាន​ទាំង​ដប់ សុទ្ធតែ​បាន​ដាក់​សារ​ព្រមាន​សុខភាព​ជា​រូបភាព​ធំ​ៗ​។ អ្វី​ដែល​គួរ​ឲ្យ​ចាប់អារម្មណ៍ យើង​ឃើញ​ថា​អនុក្រឹត្យ ស្ដី​ពី​ការ​បោះពុម្ព​សារ​ព្រមាន​ជា​ភាសា​ខ្មែរ និង​ជា​រូបភាព​នៅ​លើ​កញ្ចប់​ផលិតផល​ថ្នាំជក់ បាន​ចូល​ជា​ធរមាន​នៃ​ការ​អនុវត្ត​តាំងពី​ខែកក្កដា​ឆ្នាំ ២០១៦ មក​ម្ល៉េះ តែ​មក​ទល់​ពេល​នេះ យើង​នៅ​តែ​ឃើញ​មាន​ផលិតផល​ថ្នាំជក់​មួយ​ចំនួន ដែល​គ្មាន​សារ​ព្រមាន​សុខភាព​ត្រឹមត្រូវ ចរាចរ​នៅ​លើ​ទីផ្សារ ដដែល​។

គួរ​រំលឹក​ថា រៀង​រាល់​ឆ្នាំ​ប្រជាពលរដ្ឋ​កម្ពុជា ១​ម៉ឺន​នាក់​ស្លាប់ ដោយសារ​ការ​ប្រើប្រាស់​ថ្នាំជក់​។ ចំណាយ​ទៅ​លើ​ការ​ទិញ​បារី​នៅ​កម្ពុ​ជាមួយ​ឆ្នាំ​ៗ​អស់​ប្រមាណ ២០០ លាន​ដុ​លា្ល​រអា​មេ​រិ​ក ដែល​តម្លៃ​នេះ អាច​ធៀប​បាន​នឹង​ការ​សង់ផ្ទះ​ឈើ​ចំនួន​ជាង ៤​ម៉ឺន​ខ្នង សម្រាប់​ប្រជាពលរដ្ឋ​កម្ពុជា​នៅ​ជនបទ​។ នៅ​ក្នុង​ឆ្នាំ​២០១៣ កម្ពុជា​ខាត ៣៤,៥ លាន​ដុល្លារ​អា​មេ​រិ​ក ទៅ​លើ​ការ​ព្យាបាល​ជំងឺ​៥​មុខ ដែល​ទាក់ទង​នឹង​ការ​ប្រើប្រាស់​ថ្នាំជក់​។ យើង​សង្ឃឹមថា រដ្ឋាភិបាល​ក៏​ដូច​ជា​អាជ្ញាធរ​ពាក់ព័ន្ធ នឹង​រឹត​បន្តឹង​ការ​អនុវត្ត​ច្បាប់ និង​លិខិត​បទដ្ឋាន​ក្រោម​ច្បាប់​ស្ដី​ពី​ការ​ត្រួតពិនិត្យ​ថ្នាំជក់ ដើម្បី​បង្ការ​និង​កាត់​បន្ថយ​ផល​ប៉ះពាល់​ពី​ការ​ប្រើប្រាស់​ថ្នាំជក់​លើ​ប្រជាពលរដ្ឋ​កម្ពុជា​៕

ព័ត៌មានថ្មីៗ