សារអេឡិចត្រូនិច
រថយន្ត​យី​ឌុ​ប បុក​ម៉ូតូ​ពីក្រោយ​លើ​ស្ពាន​អ្នក​លឿង ស្លាប់​ម្នាក់


ភ្នំពេញ​: ករណី​គ្រោះថ្នាក់​ចរាចរណ៍ រវាង​រថយន្ត​យី​ឌុ​ប និង​ម៉ូតូ បណ្តាល​ឲ្យ​មនុស្ស ស្លាប់​១​នាក់ នៅ​ព្រឹក​ព្រលឹម ថ្ងៃ​ទី​២០ ខែមីនា ឆ្នាំ​២០១៧ វេលា​ម៉ោង ៥:៣០​នាទី នៅ​លើ​ស្ពាន​ត្សឹ​បា​សា (​ហៅ​ស្ពាន​អ្នក​លឿង​) គីឡូម៉ែត្រ​លេខ ៥៩-៦០ ក្នុងភូមិ​អំពិលទឹក ឃុំ​កំពង់​ភ្នំ ស្រុក​លើក​ដែក ខេត្តកណ្តាល ។

បើ​តាម​របាយការណ៍ នគរបាល​ស្រុក​លើក​ដែក បានឱ្យ​ដឹង​ថា ភាគី​ខាង​ម៉ូតូ មាន​២​នាក់ ឈ្មោះ សូ ពុធ ភេទ​ប្រុស អាយុ​២២​ឆ្នាំ មុខរបរ​កសិករ មាន​ទីលំនៅ​ភូមិ​កំហែង​រាជ ឃុំ​ឈើ​កាច់ ស្រុក​បាភ្នំ ខេត្តព្រៃវែង ស្លាប់​នៅ​កន្លែង​កើត និង​អ្នក​រួម​ដំណើរ ឈ្មោះ​ជៀវ ណា​ន់ ភេទ​ប្រុស អាយុ​២៥​ឆ្នាំ មុខរបរ​កសិករ មាន​ទីលំនៅ​ភូមិ ឃុ ជាមួយ​គ្នា បើកបរ​ម៉ូតូ​ម៉ាក​ហុងដា​សេ​១២៥ ពណ៌​ខ្មៅ​សេរី​២០១០ ពាក់​ស្លាក​លេខ​តាកែវ​1B-7402​ទិស​ដៅ​ពី​អ្នក​លឿង​ទៅ​ភ្នំពេញ​។ ចំណែក​ភាគី​ខាង​រថយន្ត ក្រោយ​កើតហេតុ​បាន​បើក​រត់គេច​ខ្លួន (​ទិស​ដៅ​ពី​ភ្នំពេញ​ទៅ​អ្នក​លឿង​) ហើយ​ត្រូវ​នគរបាល​ស្ទាក់​ចាប់​មក​វិញ​។

មូលហេតុ​នៃ​គ្រោះថ្នាក់​នេះ បណ្តាល​មក​ពី​រថយន្ត​បើក​ជែង​គ្នា ក្នុង​ស្ថានភាព​គ្រោះថ្នាក់ បណ្តាល​ឲ្យ​បុក​ម៉ូតូ ស្លាប់​មនុស្ស​១​នាក់ នៅ​កន្លែង​កើតហេតុ​។ 

ក្រោយ​ពេល​កើតហេតុ​រួច ផ្នែក​ជំនាញ​បាន​ប្រគល់​សាកសព ជូន​ក្រុម​គ្រួសារ​យក​ទៅ ធ្វើបុណ្យ​តាម​ប្រពៃណី​។

ករណី​នេះ កម្លាំង​ជំនាញ​កំពុង​បន្ត​ស្រាវជ្រាវ​រក​រថយន្ត និង​កសាង​សំណុំរឿង បន្ត​ចាត់ការ​តាម​នីតិ​វី​ធី​៕

ព័ត៌មានថ្មីៗ