សារអេឡិចត្រូនិច
ប្រៃសណីយ៍​កម្ពុជា​ដំណើរការ eSolution ​ឆ្នាំ​ក្រោយ


ភ្នំពេញៈ ក្រុមហ៊ុន​វិនិយោគ​រួម Post eSolution នឹង​បើក​ដំណើរការ​នៅ​ដើម​ឆ្នាំ​ក្រោយ​ជាមួយ​នឹង​ការ​ចាប់ផ្តើម​វិនិយោគ​ដំបូង​ ១,៥ ​លាន​ដុល្លារ​លើ​ហេដ្ឋារចនាសម្ព័ន្ធ និង​ប្រព័ន្ធ​បច្ចេកវិទ្យា​។ នេះ​បើ​យោង​តាម​លោក ឱក បូរ៉ា អគ្គនាយក​ប្រៃសណីយ៍​កម្ពុជា​ដែល​គ្រប់គ្រង​ដោយ​រដ្ឋ​។

Post eSolution ជា​ក្រុមហ៊ុន​វិនិយោគ​រួម​ទៅ​ពាណិជ្ជកម្ម​អេឡិចត្រូនិក​ថ្មី​មួយ​ដែល​បង្កើត​ឡើង​ដើម្បី​ចាប់​យក​កំណើន​ពី​ប្រតិបត្តិការ​អនឡាញ​នៅ​កម្ពុជា និង​ការ​ធ្វើ​ពិពិធកម្ម​លើ​ចរន្ត​ប្រាក់​ចំណូល​របស់​ខ្លួន​។

មាន​ក្រុមហ៊ុន​ ៣ ​ដែល​វិនិយោគ​លើ​ក្រុមហ៊ុន​ថ្មី​នេះ​ក្នុង​នោះ​ប្រៃសណីយ៍​កម្ពុជា​មាន​ ១០​ ភាគរយ​ក្រុមហ៊ុន ZVs Investment Co.,Ltd ៥០ ​ភាគរយ និង​ ៤០ ​ភាគរយ​កាន់កាប់​ដោយ​ក្រុមហ៊ុន Paxxa Mobile Solution Co.,ltd​។ នេះ​បើ​យោង​តាម​លោក បូរ៉ា​។

លោក​បាន​ថ្លែង​ថា​ដោយសារ​កំណើន​ពាណិជ្ជកម្ម​អេឡិចត្រូនិក​របស់​ទីផ្សារ​នេះ​ក្រុមហ៊ុន Cambodia Post eSolution ជា​គន្លឹះ​ដ៏សំខាន់​ក្នុង​ការ​ប្រែក្លាយ​ពី​អាជីវកម្ម​ធម្មតា​ទៅ​ជា​ពាណិជ្ជកម្ម​អេឡិចត្រូនិក​។

លោក ឱក បូរ៉ា ថ្លែង​ថា​៖ «​ដោយសារ​ក្រុមហ៊ុន​ប្រៃសណីយ៍​កម្ពុជា​របស់​យើង​ទទួល​បាន​ជោគជ័យ​រួច​ហើយ​លើ​សេវា​ដឹកជញ្ជូន​ទំនិញ​ដូចនេះ​វា​គឺជា​ឱកាស​ក្នុង​ការ​ពង្រីក​សេវា​របស់​យើង​ទៅ​ជា​សេវា​ពាណិជ្ជកម្ម​អេឡិចត្រូនិក យើង​នឹង​សហការ​ជាមួយ​អាជីវកម្ម​ក្នុង​ស្រុក​ទាំងអស់​ក្នុង​ការ​ផ្ញើ​ផលិតផល​របស់​ពួកគេ​តាមរយៈ​គេហទំព័រ​របស់​យើង ហើយ​យើង​នឹង​គិត​ប្រាក់​នៅ​ពេល​ទទួល​ទំនិញ និង​ដឹកជញ្ជូន​»​។

លោក​ថា​​ មាន​អាជីវកម្ម និង​សហគ្រាស​ក្នុង​ស្រុក​ជាង​ ៥០ ០០០ ​។

ក្រុមហ៊ុន Cambodia Post eSolution នឹង​ផ្ដល់​ការ​ផ្ញើ​សំបុត្រ​អេឡិចត្រូនិក និង​ពាណិជ្ជកម្ម​អេឡិចត្រូនិក សេវា​សំបុត្រ​អនឡាញ​តាមរយៈ​សេវា​ធនាគារ​អេឡិចត្រូនិក និង​ ការ​សម្រួល​ដល់​ការ​ទូទាត់​ដល់​គ្រឹះស្ថាន​រដ្ឋាភិបាល​ដែល​ជាប់​ពាក់ព័ន្ធ​ដូចជា​នាយកដា្ឋន​ពន្ធដារ​។ លោក​ថ្លែង​ថា​បច្ចុប្បន្ន​ក្រុមហ៊ុន​ប្រៃសណីយ៍​កម្ពុជា​បាន​ពង្រីក​អ្នក​បើកបរ​ដឹក​ជញ្ជូន​ទំនិញ​តាម​ម៉ូតូ​រួច​ហើយ​ដល់​ ១៣០ ​នាក់​។

លោក​ថ្លែង​ថា​៖ «​ពេល​នេះ​យើង​កំពុង​រៀបចំ​ផែនការ និង​យុទ្ធសាស្ដ្រ​អាជីវកម្ម យើង​នឹង​ចាប់ផ្ដើម​គេហទំព័រ​ពាណិជ្ជកម្ម​អេឡិចត្រូនិក នៅ​ដើម​ឆ្នាំ​ក្រោយ​ហើយ​យើង​សង្ឃឹម​ដំបូង​ថា​នឹង​បង្កើន​ចំណូល​សម្រាប់​វិស័យ​ឯកជន និង​ជោគជ័យ​ទាំងអស់​គ្នា​តាមរយៈ​ពាណិជ្ជកម្ម​អេឡិចត្រូនិក​នេះ​»​។

ចំណូល​ប្រៃសណីយ៍​កម្ពុជា​នៅ​ឆមាស​ទី​ ១ ឆ្នាំ​ ២០១៧ កើន​ ៦៣,៧៨ ​ភាគរយ​ដល់​ ៤,២១ ​លាន​ដុល្លារ បើ​ធៀប​នឹង​រយៈពេល​ដូច​គ្នា​កាលពី​ឆ្នាំ​ទៅ​ដែល​មាន​ចំនួន ២,៥៧ ​លាន​ដុល្លារ​។ នេះ​បើ​យោង​តាម​ទិន្នន័យ​របស់​ក្រុមហ៊ុន​៕

ប្រភព: postkhmer.com