សារអេឡិចត្រូនិច
​ក្នុងឆ្នាំនេះ​ការប្រមូលផលស្រូវ​បាន​ច្រើនជាង​ឆ្នាំមុន​ ​ដោយ​អាកាសធាតុ​អំណោយផល


ខេត្ត​ព្រៃវែង​៖ ​រដូវរំហើយ​ចូលមក​ដល់​វា​ក៏​ជា​ពេលដែល​កសិករ​មួយចំនួន​នៅ​ខេត្តព្រៃវែង​ចាប់ផ្ដើម​ប្រមូល​ផល​ជា​បណ្ដើរៗ​។​ជាមួយគ្នា​នោះ​ដោយ​កត្តា​អាកាសធាតុ​អំណោយផល​ធ្វើ​ឲ្យ​កសិករ​ច្រូតកាត់​ប្រមូល​ផល​ស្រូវ​បាន​ច្រើនជាង​ឆ្នាំមុន ​ខណៈ​ឆ្នាំមុន​មាន​ជំនន់​ទឹកភ្លៀង​ធ្វើ​ឲ្យ​លិចលង់​ស្រូវ​រលួយ​រាប់សិប​ហិកតា​ទាំង​ស្រូវ​ខ្ចី​និង​ស្រូវ​ទុំ​។​

​លោក​ ម៉ម ​ផល​ អាយុ​ ៦៤​ឆ្នាំ ​រស់នៅ​ភូមិ​ព្រៃ​ខ្វែក​ ឃុំ​ស្វាយ​អ​ន្ទ​រ ​ស្រុក​ស្វាយ​អ​ន្ទ​រ ​ខេត្តព្រៃវែង​ បាន​ឲ្យ​ដឹងថា​ឆ្នាំនេះ​ទិន្នផល​ស្រូវ​នៅ​ភូមិ​របស់គាត់​បាន​ច្រើនជាង​ឆ្នាំមុន​ ដោយ​អាកាសធាតុ​អំណោយផល​មិនមាន​ជំនន់​ទឹកភ្លៀង​ដូច​ឆ្នាំ​ទៅ ធ្វើ​ឲ្យ​ស្រូវ​ពេញកំលាំង​លូតលាស់​បានល្អ​មិន​ជួប​បញ្ហា​ជំងឺ ងាយស្រួល​ក្នុងការ​ថែ​ទ្រាំ​។​

លោកតា​បន្តថា ពលរដ្ឋ​នៅ​ស្រុក​ស្វាយ​អ​ន្ទ​រ​ ក៏ដូចជា​ស្រុក​កញ្ជ្រៀច​ និង​ស្រុក​មេសាង​ ខេត្តព្រៃវែង ភាគច្រើន​មានមុខ រ​បរជា​អ្នកធ្វើ​ស្រែ ​ហើយ​ពួកគេ​តែងតែ​យក​ពូជស្រូវ​ផ្កា​រំ​ដួ​រ ក្រសាំងទាប អ៊ី​អ័​រ និង​ស្រូវដំណើប​។​ល​។ ទាំងនេះ​ជា​ឈ្មោះ​ស្រូវពូជ​ដែល​កសិករ​ចូលចិត្ត​ធ្វើ ព្រោះ​បាន​ផល​ច្រើនជាង​ពូជ​ផ្សេងៗ​។​ដោយឡែក​ពលរដ្ឋ​នៅ​ស្រុក​កញ្ជ្រៀច​បាន​ឲ្យ​ដឹងថា​សម្រាប់​ទិន្នផល​ដែល​ទទួលបាន​ក្នុងឆ្នាំនេះ​ជា​មធ្យម​ចាប់ពី​៤​ទៅ​៦​តោន​ក្នុង​មួយ​ហិកតា​ដោយ​ឆ្នាំមុន​ពួកគាត់​ប្រមូល​ផល​បានតែ​២​ទៅ​៤​តោន​ក្នុង​មួយ​ហិកតា​។​

លោក ​អ៊ុក ​សំណាង​ ប្រធាន​មន្ទីរ​កសិកម្ម​រុក្ខ​ប្រមាញ់​និង​នេសាទ​ខេ​ត​ព្រៃវែង ​បាន​ឲ្យ​ដឹងថា​ ឆ្នាំនេះ​ដោយ​អាកាសធាតុ​អំណោយទាន​ធ្វើ​ឲ្យ​ស្រូវ​លូតលាស់​ល្អ​ទើប​ទិន្នផល​ស្រូវ​ឡើង​ជាង​ឆ្នាំទៅ​ ដូចជា​ស្រូវ​ផ្កា​រំ​ដួ​រ​ដែល​កសិករ​នៅ​ខេត្ត ព្រៃវែង​យើង​ចូលចិត្ត​ដាំ​ដុះ​មាន​ចំនួន​រហូតដល់​ជាង​១​ម៉ឺន​ហិតា​។ លោក​បន្តថា កត្តា​អា​សារធាតុ​ល្អ​ដូច​ឆ្នាំនេះ កសិករ​មាន​ភាពងាយស្រួល​ក្នុងការ​ប្រមូល​ផល​ទាន់ពេលវេលា ហើយក៏​បានធ្វើ​ឲ្យ​ជីវភាព​ពលរដ្ឋ​ប្រសើរឡើង​ផងដែរ​៕