សារអេឡិចត្រូនិច
​បញ្ឈរជើង​នាយ​សង្កាត់រដ្ឋបាល​ព្រៃឈើ​ស្រុក​កៀនស្វាយ​ រឿង​ចាប់​ឈើ​គ្រញូង​ជិត​៤០​តោន


ការបង្ក្រាប​ឈើ​គ្រញូង​ជិត​៤០​តោន​នៅ​ស្រុក​កៀនស្វាយ កម្លាំងចម្រុះ​ដឹកនាំ​ដោយ​លោក សូ សុវិទ្យា ព្រះរាជអាជ្ញារង​នៃ​អយ្យការ​អម​សាលាដំបូង​ខេត្តកណ្ដាល រក​ពុំ​ឃើញ​ម្ចាស់​ឈើ​ខុសច្បាប់​និង​ម្ចាស់​ទីតាំង​ទេ ។ ប្រភពព័ត៌មាន​ច្បាស់​ការណ៍​មួយ​បង្ហើប​ឱ្យដឹង ក្រោយ​ការបង្ក្រាប​ករណី​ដ៏​អាថ៌កំបាំង​នេះ ថ្នាក់លើ​បាន​បញ្ឈរជើង​លោក អ៊ី សុ​ភី នាយ​សង្កាត់រដ្ឋបាល​ព្រៃឈើ​ស្រុក​កៀនស្វាយ រហូតមកទល់​ពេលនេះ ។​

​រយៈពេល​ជិត​បី​ខែ​ហើយ ករណី​ចាប់​ឈើ​គ្រញូង​និង​ធ្នង់​ជិត​៤០​តោន​នៅ​ស្រុក​កៀនស្វាយ ស្ថិតក្នុង​ភាពអាថ៌កំបាំង​នៅឡើយ​គឺ ពុំទាន់​រកឃើញ​ម្ចាស់​ឈើ​ខុសច្បាប់​នេះ​នៅឡើយ​ទេ ។ ប៉ុន្តែ​ទោះបីយ៉ាងណា លោក សូ សុវិទ្យា ព្រះរាជអាជ្ញារង​នៃ​អយ្យការ​អម​សាលាដំបូង​ខេត្តកណ្ដាល បាន​កោះហៅ​ម្ចាស់​ទីតាំង​ចូល​បំភ្លឺ​ជា​លើក​ទី​ពីរ នៅ​ថ្ងៃទី​៣០ ខែវិច្ឆិកា ខាងមុខនេះ​។​

​ប្រភពព័ត៌មាន​ច្បាស់​ការណ៍​មួយ​បង្ហើប​ឱ្យដឹង​នៅ​ថ្ងៃទី​២០ ខែវិច្ឆិកា ថា ក្រោយ​ចាត់ការ​តាម​នីតិវិធី​ជា​បន្តបន្ទាប់ លោក​សូ សុវិទ្យា ព្រះរាជអាជ្ញារង​នៃ​អយ្យការ​អម​សាលាដំបូង​ខេត្តកណ្ដាល ធ្លាប់​កោះហៅ​ម្ចាស់​ទីតាំង​ចូល​បំភ្លឺ​ម្តង​រួចមក ហើយ​កាលពី​ថ្ងៃទី​២៧ ខែតុលា តែ​ម្ចាស់​ទីតាំង​រូបនេះ ពុំបាន​បង្ហាញខ្លួន​ឡើយ ទើប​ពេលនេះ​តុលាការ​កោះហៅ​ម្តងទៀត នៅ​ថ្ងៃទី​៣០ ខែវិច្ឆិកា ។ ទោះបីយ៉ាងណា អត្តសញ្ញាណ​ម្ចាស់​ទីតាំង​រូបនេះ ពុំ​ត្រូវបាន​ប្រភពព័ត៌មាន​បញ្ជាក់​ឱ្យដឹង​នោះទេ ។​

​ឈើ​គ្រញូង​និង​ធ្នង់​ជិត​៤០​តោន ត្រូវបាន​ខណ្ឌ​រដ្ឋបាល​ព្រៃឈើ​ខេត្តកណ្ដាល ក្រោម​ការសម្របសម្រួល​ពី​លោក សូ សុវិទ្យា ព្រះរាជអាជ្ញារង​នៃ​អយ្យការ​អម​សាលាដំបូង​ខេត្តកណ្ដាល រកឃើញ​កាលពី​ថ្ងៃទី​៣១ ខែសីហា ឆ្នាំ​២០១៧​កន្លងទៅ​។​ពេលនោះ​ត្រូវបាន​ប្រភពព័ត៌មាន អះអាងថា មាន​អ្នក​អន្តរាគមន៍​ជាច្រើន ហើយ​សូម្បី​ម្ចាស់​ទីតាំង​និង​ម្ចាស់​ឈើ​គ្រញូង ក៏​អាជ្ញាធរ​រក​ពុំ​ឃើញ​ដែរ ៕